МЭНДЧИЛГЭЭ
Хан-Уулаа түшиж, хатан туулаа эмжин налайсан Хан-Уулын иргэд та бүхнийхээ амрыг эрэн мэндчилж байна.
Монгол Ардын Намаас нэр дэвшигчид УИХ-д 65 суудал авч Засгийн газраа дангаараа бүрдүүлж үнэмлэхүй ялалт байгуулахад та бүхний идэвхи зүтгэл асар их байсан гэдэгт итгэлтэй байна. Нийслэлийн Иргэдийн Төлөөлөгчдийн хуралд 34 төлөөлөгч, Дүүргийн Иргэдийн Төлөөлөгчдийн хуралд 18 төлөөлөгч, Монгол Ардын Намаас сонгогдож засаглах эрхээ олж авахад та бүхэн бидэнд итгэл үзүүлсэнд баярлаж байгаагаа илэрхийлье.
Бид та бүхний итгэлийг зүтгэлээр хариулж Монгол Ардын Намаас бүх шатанд дэвшүүлсэн мөрийн хөтөлбөрөө бүрэн хэрэгжүүлнэ гэдэгт та бүхэн итгэлтэй байж болно. Бид удирдлагын бүх шатанд мэргэжлийн, мэдлэг чадвартай шударга хүнийг сонгон шалгаруулж ажиллуулахаас гадна итгэл алдаж, үүргээ биелүүлээгүй хүнтэй цаг тухай бүрт нь хариуцлага тооцож ажиллах болно. Бидний зорьсон зорилгоо биелүүлэхэд иргэд та бүгдийн идэвхитэй оролцоо дэмжлэг туслалцаа онцгой чухал учир та бүхэнтэйгээ байнгын холбоотой хамтран ажиллах болно. Хан-Уулчууд та бидний ажил амьдрал нь өөдрөг эрүүл энх аз жаргалтай байх болтугай.
Засаг дарга
Ж.АЛДАРЖАВХЛАН
МЭНДЧИЛГЭЭ
Хан Богд уул, Хатан туулаараа овоглосон нийт Хан-Уулчууд та бүхний энэ өдрийн амгаланг айлтган мэндчилж байна.
Иргэдийнхээ аз жаргалтай тайван амьдрал, эрүүл “ЭКО” Хан-Уул дүүргийг бий болгохын төлөө сонгогч түмнийхээ итгэл найдварыг хүлээж сонгуулийн үр дүнгээр байгуулагдсан манай Иргэдийн Төлөөлөгчдийн Хурал дүүргийнхээ цаашдын хөгжил цэцэглэлтэд жинтэй хувь нэмэр оруулж, иргэдтэйгээ эрх ашгийг цаг ямагт хамгаалж ажиллах болно. Нутгийн өөрөө удирдах ёсны байгууллагын залгамж халааг мэргэжлийн баг хамт олноор бүрдүүлж дүүргийн эдийн засаг, нийгмийн чадавхи бололцоог улам бүр нэмэгдүүлэхийг төлөө хэлтсийн зохион байгуулалтыг хийлээ.
Иргэдийн Төлөөлөгчдийн Хурлын Тэргүүлэгчдийн ажлын алба нь “Хуралдаан зохион байгуулалт, эрх зүй”, “Хууль тогтоомж, хурлын шийдвэрийн сурталчилгаа, хяналт”, “Санхүү, аж ахуй” болон “Төлөөлөгч, Намын бүлэг хариуцсан хэлтэс” гэсэн дөрвөн хэлтэстэйгээр иргэн танд үйлчлэхээр ажиллаж байна. Хан-Уул дүүрэгтэй хувь заяагаа холбосон нийт иргэд та бүхний гэр бүл, үр хүүхдүүд эрүүл энх, инээд баясал дүүрэн байж хийж бүтээсэн бүхэн тань амжилт арвин бялхаж байхын өлзийтэй ерөөлийг өргөн дэвшүүлье.
ИТХурлын дарга
Г.БАТСАЙХАН
