Хан-Уул дүүргийн Засаг даргын 2017-2020 оны үйл ажиллагааны хөтөлбөртөө “Эко дүүрэг-Ногоон хөгжил” зорилтыг тусгасан. Тус зорилтынхоо хүрээнд нийслэлийн өнгийг тодорхойлогч Хан-Уул дүүрэг нь “ЭКО ДҮҮРЭГ” болох зорилт тавин амжилттай хэрэгжээд явж буй.
Өнгөрсөн хавар “Хоггүй – Хан-Уул” аян эхлүүлж “Эко дүүрэг” нэрийн хуудастай болсон Хан-Уул дүүргийн Засаг даргын Тамгын газар энэ удаад “Хоггүй – Хороо” хоёр сарын аяны нээлтээ өнөөдөр хийлээ. Тус аяныг эхлүүлсэнээр Хан-Уул дүүргийн нутаг дэвсгэрт хоггүй цэвэр орчин нөхцөл бүрдүүлэх, орчны болон агаарын бохирдлыг арилгах, нийтийн эзэмшлийн гудамж, зам, талбайн өнгө үзэмжийг сайжруулах, хог хаягдал цэвэрлэх, ачиж тээвэрлэх үйл ажиллагааг эрчимжүүлэх зорилгоор эхлүүлээд байна.
Мөн хог хаягдлын тухай хуулийн хэрэгжилтийг хангах, иргэдэд сурталчлан таниулах, хогийг ангилан ялгах, хороодын үйл ажиллагааг дэмжих зорилготой билээ. Хоёр сар үргэлжлэх “Хоггүй хороо” аян нь Хан-Уул дүүргийн 16-н хороодын дунд болзолт уралдаан зарласан бөгөөд энэхүү аяны үйл ажиллагаанд идэвхи санаачлагатай манлайлан оролцсон 3 хороог шалгаруулж өргөмжлөл, мөнгөн шагналаар шагнах юм.
Иймд “Хоггүй хороо” хоёр сарын аяны үйл ажиллагаанд дүүргийн иргэд, аж ахуйн нэгж, байгууллага, сургууль, цэцэрлэг идэвхитэй оролцохыг зохион байгуулагч нарын зүгээс уриаллаа. Аяны нээлтэнд Хан-Уул дүүргийн Засаг даргын нэгдүгээр орлогч Г.Батсайхан, Засаг даргын орлогч дарга А.Амартүвшин, ТҮТ-ОНӨААТҮГ-ын захирал Ц.Эрдэнэбаатар, Засаг даргын Тамгын газрын хэлтэс албадын дарга, Хороодын Засаг дарга нар болон хороодын ажилчин, албан хаагчид, иргэдийн төлөөлөл оролцлоо.
