2017 оны 10 дугаар сарын 04 өдөр Засаг даргын А/334 захирамжаар Гэмт хэргээс урьдчилан сэргийлэх ажлыг эрчимжүүлэх зорилготой сарын аяны нээлт өнөөдөр Хан-Уул дүүргийн Соёлын ордны гадна талбайд боллоо.
Хан-Уул дүүргийн Засаг дарга Ж.Алдаржавхлангийн санаачлагаар “Гэмт хэргээс урьдчилан сэргийлэх” сарын аяныг Хан-Уул дүүргийн Засаг даргын Тамгын газар дүүрэг дэх Цагдаагийн 1, 2-р хэлтэс, Замын цагдаагийн хэлтэстэй хамтран зохион байгууллаа.
“Гэмт хэргээс урьдчилан сэргийлэх” сарын аян нь 2017 оны 10 дугаар сарын 04-ны өдрөөс 2017 оны 11 дүгээр сарын 04-ны өдөр хүртэл үргэлжлэх бөгөөд аяны хүрээнд 33 арга хэмжээ зохион байгуулагдахаар төлөвлөөд байна.
Үүнд:
- Аж ахуйн нэгж байгууллагууд гадна орчиндоо гэрэлтүүлэг, камержуулалт хийх
- Цагдаагийн алба хаагчдын “Нэгдсэн эргүүл” арга хэмжээ
- “Урамшуулалт эргүүл” тусгай арга хэмжээ
- Аж ахуйн нэгж байгууллагуудаар гэмт хэргээс урьдчилан сэргийлэх туг аялуулах
- Урьдчилан сэргийлэх “Нээлттэй хаалганы өдөр”
- Ерөнхий боловсролын сургуулиудын ахлах ангийн сурагчдыг шүүхийн үйл ажиллагаатай танилцуулах
- Их, Дээд, Ерөнхий боловсролын сургуулиудын сурагчдад урьдчилан сэргийлэх, үүрэг, хариуцлагын чиглэлээр сургалтыг зохион байгуулах зэрэг үйл ажиллагаа зохион явагдана.
“Гэмт хэргээс урьдчилан сэргийлэх” сарын аяны нээлтийн үйл ажиллагаанд Засаг даргын нэгдүгээр орлогч, Дүүргийн гэмт хэргээс урьдчилан сэргийлэх ажлыг зохиоцуулах зөвлөлийн гишүүн Г.Батсайхан, Засаг даргын Тамгын газрын дарга Б.Энхболд, Хан- Уул дүүргийн Цагдаагийн 1 дүгээр хэлтсийн дарга С.Хүрэлбаатар, Хан- Уул дүүргийн Цагдаагийн 2 дугаар хэлтсийн дарга Н.Батбаяр, Хан-Уул дүүргийн Замын цагдаагийн хэлтсийн дарга Г.Бямбадорж, тамгын газрын хэлтэс, хороодын засаг дарга нар, Цагдаагийн алба хаагчид, дүүргийн иргэдийн төлөөлөл оролцлоо.
“Гэмт хэргээс урьдчилан сэргийлэх” сарын аянд Хан-Уул дүүргийн аж ахуй нэгж байгууллага, цэцэрлэг, сургууль, иргэд идэвх санаачлагатай оролцон гэмт хэргээс хамтдаа урьдчилан сэргийлцгээе хэмээн зохион байгуулагч нарын зүгээс уриаллаа.
