/2023.09.07/ Монгол Улсын хэмжээнд 2 жил тутам зохион байгуулагддаг Монголын хүүхдийн спортын зуны VII наадмын шигшээ тэмцээнд 21 аймаг, 9 дүүргийн 43 мянган өсвөрийн тамирчдаас шалгарсан шилдэг 7000 тамирчид спортын 23 төрөлд өрсөлдсөнөөс Хан-Уул дүүргийн Засаг даргын дэргэдэх Өсвөрийн 200 тамирчин спортын 21 төрөлд өрсөлдөж, медалийн чанар, тоогоор улсдаа аваргалан ТЭРГҮҮН байрт шалгарсан билээ.
21 аймаг, 9 дүүргээс ТЭРГҮҮН байр эзэлсэн эдгээр тамирчин сурагчид, багш дасгалжуулагчдыг өнөөдөр дүүргийн Засаг дарга Ж.Алдаржавхлан хүлээн авч хүндэтгэл үзүүллээ.
Уулзалтын эхэнд Засаг дарга Ж.Алдаржавхлан “Улсын хэмжээний чансаа өндөр тэмцээнд амжилттай оролцон 26 алт нийт 72 медаль авсан тамирчин хүүхдүүд, багш, дасгалжуулагч нартаа баяр хүргэе. Ялангуяа усан сэлэлтийн төрөлд 12 алтан медаль хүртэж, рекорд эвдэн дээд амжилт үзүүлсэн тамирчин дүү Э.Эрхэсдээ талархал илэрхийлье. Та бүхэн бэлтгэлийнхээ хажуугаар хичээл сургалтаа орхигдуулахгүй зэрэгцүүлэн суралцаж, бэлтгэлээ хийж байхыг хувийнхаа зүгээс хүсэж байна. Учир нь спорт бол залуу насны карьер. Оюуны спорт бол насан туршийнх. Ялангуяа Математик, Хими, Физик гээд гурван гол хичээлийг хүүхэд бүхэн сайн үзэж, суралцаарай гэж хэлмээр байна. Математикийн хичээлдээ “гангардаг” хүн амьдрал дээрээ ч гангардаг гэж би боддог. Улс орныхоо нэрийг дэлхийд гаргасан олон алдар цуутай шинжлэх ухаанч, инженерүүд, тамирчид энэ танхимд сууж байгаа гэдэгт итгэлтэй байна” хэмээгээд амжилт үзүүлсэн тамирчин хүүхдүүд, багш, дасгалжуулагч нарыг шагнаж, урамшууллаа.
Мөн УИХ-ын дарга Г.Занданшатар улсын хэмжээний шилдэг сургуулиар шалгарсан Ерөнхий боловсролын “Орчлон” сургуульд Чингис хааны эш хөрөг, өргөмжлөл, мөнгөн шагналаар шагналаа.
Дүүргийн Засаг даргын дэргэдэх Өсвөрийн шигшээ багийн тамирчид Зуны спортын тэмцээнээс 26 алт, 22 мөнгө, 24 хүрэл, нийт 72 медаль хүртэж, улсдаа тэргүүлсэн бол Орхон аймагт зохион байгуулагдсан Өвлийн спортын наадамд 23 тамирчин спортын 8 төрөлд өрсөлдөж, 4 алт, 5 мөнгө, 3 хүрэл нийт 12 медаль тус тус хүртэн нийслэлийн 9 дүүргээ тэргүүлсэн амжилт үзүүлжээ.
БАГ ТАМИРЧИДДАА АМЖИЛТ ХҮСЬЕ.
