2024 онд Хан-Уул дүүргийн нутаг дэвсгэрийн хэмжээнд хүүхэд хохирсон хэрэг бүртгэлт болон мөрдөн байцаалтын 618 хэрэгт хяналт тавьж ажилласнаас 518 буюу 84 хувьд хэрэг бүртгэлт, 100 буюу 16,1 хувьд мөрдөн байцаалтын ажиллагаа явуулжээ.
Үүнээс энэ онд шинээр үйлдэгдсэн 392 хэрэгт 427 хүүхэд хохирсноос 14 хүртэлх насны 163, 14-16 насны 191, 17-18 насны 73 хүүхэд, хүйсийн хувьд эрэгтэй 217, эмэгтэй 210 хүүхэд байна.
Хэрэг бүртгэлтийн ажиллагаа явуулсан 518 хэргээс 121 буюу 23,3 хувийг хааж, 68 буюу 13,1 хувьд эрүүгийн хэрэг үүсгэж яллагдагчаар татсан байна.
Өмнөх онтой харьцуулахад хэрэг бүртгэлт явуулсан хэрэг 162 буюу 45,5 хувиар, хэрэг бүртгэлтээс эрүүгийн хэрэг үүсгэж яллагдагчаар татсан 19 буюу 38,7 хувиар, өссөн бол хэрэг бүртгэлтийг хаасан 16 буюу 11, 6 хувиар буурсан.
Мөрдөн байцаалтын ажиллагаа явуулсан хэрэг 3 буюу 2,9 хувиар, яллах дүгнэлт үйлдэж шүүхэд шилжүүлсэн 3 буюу 4,6 хувиар тус тус буурсан бол хэргийг хэрэгсэхгүй болгосон мөн онтой ижил түвшинд байна.
Хүүхэд хохирсон гэмт хэрэгт шүүхээс нийт 41 хэргийн 41 хүнд эрүүгийн хариуцлага хүлээлгэсэн нь өмнөх онтой харьцуулахад хэрэг, хүн тус тус 7 буюу 17 хувиар буурчээ.
Ялын төрлөөр нь авч үзвэл 9 хүнд хорих ял, 17 хүнд торгох ял, 2 хүнд зорчих эрхийг хязгаарлах ял, 7 хүнд нийтэд тустай ажил хийлгэх ял, 3 хүнийг ялаас чөлөөлж, 3 хүнд хорих ял оногдуулахгүйгээр тэнсэж, албадлагын арга хэмжээ авсан нь өмнөх онтой харьцуулахад хорих ялаар шийтгүүлсэн хүн ижил түвшинд, торгох ялаар шийтгүүлсэн хүн 5 буюу 41.6 хувиар, хорих ял оногдуулахгүйгээр тэнссэн хүн 3 буюу 50 хувиар, ял хойшлуулсан хүн 1 дахин тус тус буурсан бол зорчих эрх хязгаарлах ялаар шийтгүүлсэн хүн 1 буюу 50 хувиар өссөн байна.
Мөн Эрүүгийн хуулийн тусгай ангийн 12.1 дүгээр зүйлийн 4 дэх хэсэгт заасан “Хүчиндэх гэмт хэргийг бага насны хүүхдийн эсрэг үйлдсэн” гэмт хэрэгт шүүхээс нийт 6 хэргийн 6 хүнд эрүүгийн хариуцлага хүлээлгэсэн нь өмнөх онтой харьцуулахад хэрэг 3 буюу 33.3 хувиар, хүн 4 буюу 40 хувиар тус тус буурчээ. Ял шийтгүүлсэн 5 хүнд 12-20 жил, 1 хүнд 21 жилийн хорих ял оногдуулжээ.