Хаан банкны хамт олон 30 жилийн ойгоо тохиолдуулан 3×3 сагсан бөмбөгийн талбайг нийгмийн хариуцлагын хүрээнд Биокомбинатад байгуулж өнөөдөр нээлтээ хийлээ. Орчин үеийн стандартад нийцсэн уг сагсан бөмбөгийн талбай нь 12 дугаар хорооны хүүхэд залуучуудын чөлөөт цагаа спортоор хичээллэж зөв боловсон өнгөрүүлэх газрын нэг болж байна. Нээлтийн үйл ажиллагаанд Хан-Уул дүүргийн болон Хаан банкны холбогдох удирдлагууд, иргэдийн төлөөлөл оролцлоо.
Спорт тэр дундаа сагсан бөмбөг нь бие бялдарын хөгжил олгохоос гадна багийн спорт гэдэг утгаараа хүүхдийг баг балчираас нь тэсвэр хатуужилтай, багаар ажиллах, сэтгэн бодох самбаачлах чадвартай болгодгоороо онцлогтой спорт юм. Тиймээс энэхүү ажил нь хүүхдийн сурч боловсрох цаашлаад ирээдүйд нь хийж байгаа бага мэт харагдах боловч бодитой хөрөнгө оруулалт болж байна. Нийслэл хот тэр дундаа Хан-Уул дүүргийн хүүхэд багачууд маань сагсан бөмбөгийн спортоор сонирхон хичээллэж, тэмцээн уралдаанд амжилт үзүүлсээр байгаа юм.
Хан-Уул дүүргийн 12 дугаар хорооны Засаг дарга Д.Долгор: Манай хороонд орчин үеийн стандартад нийцсэн сагсан бөмбөгийн талбай байгуулж өгч байгаад баяртай байна. Хан-Уул дүүргийн 12 дугаар хорооны хүүхэд багачууд маань сагсан бөмбөгөөр хичээллэх маш их дур сонирхолтой байдаг. Тэр дундаа 3×3 төрлөөр хүүхэд залуучууд маань хичээллэж, тэмцээн уралдаанд амжилт үзүүлдэг. Хүүхдүүдийг сонирхсон спортоор нь хичээллэж амжилт гаргахад нь дэмжлэг болж байгаа нь маш сайшаалтай үйл хэрэг болж байна гэж хорооны засаг даргын зүгээс мөн иргэдийнхээ нэрийн өмнөөс баяртай байгаагаа илэрхийлмээр байна.
Хан-Уул дүүргийн 12-р хороо Био комбинат орчимд энэ жил зургаан сагсан бөмбөгийн талбай ашиглалтад орохоор болоод байна. Спортоор хичээллэхийн ач холбогдлыг ойлгуулж үлгэрлэж байгаа 12 дугаар хорооны багш сурган хүмүүжүүлэгч, хүүхэд залуус, дэмжин ажиллаж байгаа хувийн хэвшлийн байгууллага хамт олондоо баярлалаа.
