XVII жарны нөхөрсөг хэмээх шар Нохой жилийн Сар шинийн баярыг тохиолдуулан Нийслэлийн хөдөө аж ахуйн салбарт олон жил үр бүтээлтэй ажилласан малчид, тариаланчдыг шагнаж урамшуулах Нийслэлийн Иргэдийн Төлөөлөгчдийн Хурлын Тэргүүлэгчдийн тогтоолоор Хан-Уул дүүргээс Нийслэлийн шилдэг фермерч, шилдэг тариаланчид өнөөдөр /2018.02:14/ тодорлоо.
Хан-Уул дүүргийн 12 дугаар хорооны иргэн А.Түвшинжаргал, Б.Цээлээжав, 14 дүгээр хорооны иргэн П.Жаргалтогтох нар “Нийслэлийн тэргүүний фермер”-ээр, 13 дугаар хорооны иргэн У.Ганцогт, 14 дүгээр хорооны иргэн Ц.Наранцэцэг “Нийслэлийн тэргүүний тариаланч”-аар тус тус шалгарсан бөгөөд шагналыг Хан-Уул дүүргийн Засаг дарга Ж.Алдаржавхлан, дүүргийн ИТХ-ын дарга Цэрэн, Засаг даргын нэгдүгээр орлогч Г.Батсайхан, Засаг даргын зөвлөх Ч.Бат-Оргил, дүүргийн ИТХ-ын төлөөлөгчид болон бусад холбогдох албаны хүмүүс гардууллаа.
12 дугаар хорооны фермер Б.Цээлээжав нь 2004 оноос хойш фермерийн аж ахуй эрхэлж байгаа бөгөөд сүүлийн жилүүдэд малын зүй бус хорогдол гаргалгүй малаа жил дараалан өсгөж, механикжсан үнээний аж ахуй болгосон . Жилд дунджаар 150 гаруй тонн сүү үйлдвэрлэн, нийслэлийн хүн амын сүүний хэрэгцээнд нийлүүлдэг байна . Түүнчлэн фермийн үйл ажиллагаагаа өргөжүүлж, малын тэжээл, усан хангамжаа сайжруулан, хорооны 2 иргэнийг малчнаар дадлагажуулан ажиллуулж, ажлын байраар ханган, өрхийн орлогыг нь нэмэгдүүлсэн Хан-Уул дүүргийн үлгэр жишээч иргэн юм.
Мөн 12 дугаар хорооны фермер А.Түвшинжаргал, 14 дүгээр хорооны фермер П.Жаргалтогтох нар 2010 оноос фермерийн аж ахуйн эрхэлж, мал сүргээ жил дараалан өсгөж, малынхаа үүлдэр угсааг сайжруулах, нэгжээс авах ашиг шимийг нэмэгдүүлж, хорооны 2-3 иргэнийг байнгын ажлын байраар ханган ажиллаж буй үлгэр жишээ дүүргийн шилдэг залуу фермерүүд юм.
.jpg)
“Нийслэлийн тэргүүний тариаланч” Ц.Наранцэцэг нь 2008 онд хүнсний ногоо, жимсний мод тариалж эxэлсэн бөгөөд өдгөө 10-15 төрлийн хүнсний ногоо 20 гаруй төрлийн мод бут тарьж жилдээ 5-15 тонн (төмс хүнсний ногоо,жимс жимсгэнэ) хураан авдаг байна.
13 дугаар хорооны “Нийслэлийн тэргүүний тариаланч” У.Ганцогтын аав нь 2003 онд “Нийслэлийн тэргүүний тариаланч”-аар шагнагдаж байсан бөгөөд үе дамжсан үлгэр жишээч тариаланч юм байна. Тэрээр ажил үйлсийг минь үнэлж шагнаж урамшуулж байгаа явдалд талархал илэрхийлж, цаашид жил бүр ажлын байрыг нэмэгдүүлэн улс эх орондоо ихийг хийж бүтээх эрмэлзэл байгаагаа илэрхийллээ.
Дүүргийн Засаг дарга Ж.Алдаржавлан Нийслэл, дүүргийнхээ иргэдийг сүү,төмс хүнс ногоогоор хангахад та бүхний хувь нэмэр их гэдгийг хэлж, сүүний гарц, ашиг шимийг нэмэгдүүлэх, борлуулалтанд анхаарч, эрчимжсэн мал аж ахуй, газар тариаланг хөгжүүлэхэд гол чиглэлээ болгон, дэмжиж ажиллахаа илэрхийллээ. Түүнчлэн малын үүлдэр, угсаагаа сайжруулан Улсын аварга фермер, тариаланч болохыг хүсэн ерөөлөө.
